PAKDHE OKE

Pendhak uwong mesthi nduweni pengalaman, Pengalaman mau bisa awujud seneng utawa susah, kadhang bisa uga lucu. Kaya dene pengalamanku “Pakdhe Oke” ing ngisor iki.

Tanggaku sing asmane Pakdhe Nan kuwi yen ngendikan pancen rada dhuwur alias sombong amarga pancen ngendelake donyane sing pancen luwih ana tinimbang tangga – tanggane. Jenenge yen kakehan umuk mesthine tanggane ya ana sing ora seneng utawa serik. Yen bisa dak padhakake ngono meh padha karo Pak Jalal ing sinetron SCTV “ Para pencari Tuhan”. Senajan amale gedhe ning nganyelke wong sing dijak ngomongan.

Nalika pakdhe Nan duwe gawe nyunatake putrane, sing diundang akeh. Wong sadesa kabeh diulemi, semono uga wong desa liyane, kalebu wong sing tau ditekani nalika duwe gawe. Pangarepe mengko oleh buwuhan akeh wong dheweke yen buwuh paling sitik Rp. 100.000.

Nalika bubar gawe, langsung wae mbukaki oleh – olehane amplop. Lhadalah, entuke sumbangan ora kaya sing diangen – angen. Amplope akeh sing kosong.

“ora dadi apa, wong aku isih sugih. Dhuwitku isih akeh. Ya ngiras ngamal.” Ngono ngendikane Pakdhe Nan. Mula ponakanku yen ngaturi Pakdhe Nan , Pakdhe Oke.

Nuju sawijining dina, pakdhe oke tindak ziarah rombongan karotangga – tanggane neng wali lima.Zairah sinambi ngenggar – enggar ati.

Wiwitan sing dijujug yaiku Surabaya saperlu zairah neng Sunan Ampel. Tekan kana, wong – wong padha genti – genten saperlu reresik. Ana sing wudhu, ya ana sing adus. Yen sing siji mlebu jendhing, sing siji jaga barang – barang ana ing jaba. Nalika Pakdhe Oke giliran arep mlebu jendhing, ora ana sing jaga barang – barange nanging ya meksa mlebu jendhing. Barang gawane diseleh sandhing lawang. Pakdhe Oke mlebu jendhing mung sarunga. Klambi lan clana diseleh dhuwur lawang.

Nalika rampung reresik awak, klambi lan clane ing sampiran wis ora ana. Pakdhe Oke nekad metu. Jebul tas lan barang – barang liyane uga ora ana. Illang. Kamangka dhompet – dhompete lan liyan – liyane neng sak clana sing ilang saka sampiran mau.

Kepeksa pakdhe Oke nerusake nglencer mung nganggo sarung wae. Ora nganggo klambi lan clana. Lha kepriye, wong dhuwit sadhompete ilang. Dadi arep tetukon sandhangan ya ora bisa. Sing kebangeten ya kancane nglecer, dheweke ora gelem nyilihi dhuwit apa klambi. Mbok menawa saka anggone umuk, mula Pakdhe Oke disengaja ora disilihi. Malah mung dadi garapan, guyonan.