TEMBANG

•         Tembang Dolanan

Tembang dolanan yaiku tembang kanggo bocah-bocah kang duwe ancas nglipur ati ben padha seneng lan keslamur atine supaya ngimbangi antarane “kegiatan” lair lan batine. Ana ing pagelaran wayang, pas nalika gara-gara tembang dolanan asring digunakake.

Judul-judul tembang dolanan:

1.      Cublak-cublak suweng

2.      Sluku-sluku bathok

3.      Kate-kate dipanah

4.      Aku duwe pitik

5.      Jamuran, lsp.

Tuladha tembang dolanan:

Aku Duwe Pitik

Slendro Pathet Sanga

Aku duwe pitik, pitik tukung,

Saben dina dakpakani jagung,

Petoh gogog petog petog ngendhog pitu,

Dakngremake netes telu,

Dadi jago go adon klawu,

Awake otot tot mungsuh mlayu.

            Piwulang budi pekerti kang bisa kapethik saka tembang ing dhuwur yaiku:

1.      Watak tanggung jawab, yen ngingu kewan kudu diopeni kanthi becik.

2.      Ngerti males budi.

3.      Sing sapa nandur kabecikan, bakal ngundhuh kabecikan.

4.      Kang ora prelu ditiru (ditindakake) seneng adu jago, ora becik.

• Tembang Campursari

Tembang campursariiku jinising lelagon Jawa. Campursari tegese lelagon Jawa kang ngemot pirang-pirang aspek seni (sajroning lelagon pepak banget). Katitik saka lagu kang kerep dianggo campursari bisa awujud: lagu dolanan, langgam, macapat, tembang gedhe, sekar gendhing, bawa, umpak-umpak, lsp. Tokoh campursari sing kondhang yaiku Manthou’s, Didi Kempot, Nurhana, Mamiek Melani lan liya-liyane.

Instrumen kang dianggo ngiringi lagu, awujud gamelan tradisional Jawa lan musik nasional. Lelorone dianggo bebarengan kanthi trep, nganti kepenak dirungokake. Gabungan instrumen kasebut diangkah supaya tinemu harmoni seni campursari. Instrumen campursari kang kerep kanggo, kayata kendhang, demung, gong, rebab, piano, lan gitar.

Miturut wujude campursari kaperang dadi:

1.      Lelagon Campursari

Tuladha: Gethuk, Tamba Ati, Nonong, Cucak Rawa, Mbah Dukun.

2.      Macapat Campursari

Tuladha: Anjasmara Arimami (Asmarandana), Sidasih, Turu, Lare (Dhandhanggula), Dedalan (Mijil), Semar Iku (Pocung).

3.      Lelagon Dolanan

Tuladha: Dhayohe Teka, Turi-turi Putih, Aja Lamis, Buta Galak, Iris-irisan Ela, Canthing Jali.

4.      Langgam Campursari

Tuladha: Ngidamsari, Reformasi, Caping Gunung, Dadi Ati, Ketaman Asmara, Resepsi, Anting-anting, Aja Sembrana, Jenang Gula, Wuyung, Yen ing Tawang.

5.      Lelagon Sekar Gendhing Campursari

Tuladha: Wahyu, Ayak Pamungkas, Puspa Giwang, Umbul Donga.

Tuladha Langgam Campursari:

Ketaman Asmara

Saben wayah lingsir wengi

Mripat iki ora bisa turu

Tansah kelingan sliramu

Wong kang dadi pepujanku

Bingung rasaning atiku

Arep sambat nanging karo sapa

Nyatane ora kuwaaw

Ngrasakake atiku mung tansah nelangsa

Wis tak lali-lali

Nanging tekan besuk kapan

Nggonku mendhem ora bisa turu

Apa iki sing jenenge

Wong kang lagi ketaman asmara

Nyatane ora kuwawa

Ngrasake atiku sing saya nelangsa