WONG JAWA ILANG JAWANE

( Kapethik saka: Kumpulan Guritane Den Behi ing Tengah Wengi, Maret 2009)

Aku iki wong jawa

Tedhak turune Jayabaya

Uripku ing jaman kang mardika

Esuk sore bengi awan diajari basa

Anggonku sinau kanthi kapeksa

Nganti saiki aku ora bisa basa

              Sinau basa kok nganggo dipeksa

              Ora dipeksa wae isih ora bisa

              Apa maneh nganggo dipeksa?

              Sinau basa dipeksa

              Budaya nulis dipeksa

              Maca nulis dipeksa

 Ngomong nganggo basa krama dipeksa

Ngono kok njaluk bisa basa….

Sapa kandha

             Wong Jawa wae ngomong Jawa ora bisa

      Wong manca malah pinter basa Jawa

      Surakarta-Ngayogyakarta iku pranyata

      Dadi seksi wong Landa

      Kang padha nggegulang Basa Jawa

      Seni, budaya, nulis, lan maca

      Kabeh digegulang nganti bisa

      Linambaran ati seneng ora kepeksa

                     Mulane wong Landa pintere gluwihi kita

              Sing duweni kabudayan tedhak turune Jayabaya

              Nanging …. 

              Kasunyatane kita ora bisa

              Wong Landa malah sangsaya cetha trawaca

               Anggone padha nggubah lan nggegulang budaya kita

       Jan-jane aku getun

Malah sangsaya bingung

Lha kok ora ….

Wong  Jawa ilang  Jawane

Nanging ….

Wng Landa malah njawani

Apa iki kang diarani wolak-waliking jaman?

       Embuh ora ngerti

Sing wigati ….

Wiwit saiki aku seneng marang basaku dhewe